«Звязда» ( штодзённая грамадска-палітычная беларускамоўная газета Беларусі) №132 ад 17.07.2014г
Хачу моцную сям’ю. Хай мяне навучаць.
Трапяткое пачуццё, пяшчотныя матылькі, далікатныя кветачкі і душэўная цеплыня — усё гэта нібыта адчуваецца ў атмасферы «Вечароў для закаханых». Аднак іх наведванне не заўсёды завяршаецца вянцом — нярэдка пары прымаюць рашэнне расстацца. І гэты вынік станоўчы, лічаць арганізатары праекта, лідары Міжнароднай асацыяцыі вернікаў «Сужэнскія сустрэчы» ў Беларусі Павел і Алена КУЗЬМІЦКІЯ.
-- Павел, раскажыце, як узнікла ідэя Вечароў?
—Адразу папярэджу — гэтыя сустрэчы не для тых, хто шукае сябе пару. Яны для тых, хто ўжо сустракаецца, ці для тых, хто ўжо думае аб шлюбе.
Вечары арганізаваны Міжнароднай асацыяцыяй «Сужэнскія сустрэчы», якая развівалася спачатку пад крыламі каталіцкай Царквы і была распаўсюджана ў краінах Усходняй Еўропы. Пяць гадоў таму да нашага руху далучылася праваслаўная Царква. Але працуем мы не толькі для веруючых.
Асацыяцыя ставіць перад сабой задачу ўзмацнення сужэнскіх сувязяў. Яшчэ трыццаць сем гадоў таму ў гэтым узнікла неабходнасць: сем’і пачалі часцей распадацца.
Сёння «Вечары» сталі натуральнай патрэбнасцю. Пасля іх наведвання ў шлюб уступаюць больш падрыхтаваныя пары. Гэта нібыта майстар-клас жыцця не побач, а разам.
—Але маладыя людзі цяпер не баяцца жыць разам: спрабуюць, не атрымліваецца — разыходзяцца…
—Гэта так, але ў тым насамрэч і праблема. У маладых людзей ёсць страх перад шлюбам. Адтуль і так званыя «пробныя шлюбы», іншымі словамі — грамадзянскі шлюб, ці свабодныя саюзы без прыняцця адказнасці за будучыню. Гэтая з’ява ў многім вынікае з асабістага страху ў сэрцы маладых перад думкай, што ў іх не атрымаецца стварыць моцную сям’ю. Гэты страх параджае з’яву — быць проста побач, каб пры з’яўленні цяжкасцяў была магчымасць разысціся. Так здараецца таму, што моладзь не бачыць вакол сябе прыкладаў устойлівых зносін і сапраўднага кахання ў сваіх бацькоў ці ў іншых сваякоў. Бачаць нешчаслівыя сем’і ці сем’і, якія распаліся. Такія прыклады нібыта паралізуюць маладых перад зносінамі, плюс да гэтага неразуменне значэння шлюбу. Нашы «Вечары» — гэта магчымасць для маладых акунуцца ў асяроддзе, дзе каханне і любоў непадзельныя. Такія сустрэчы вядуць пары, якія разам жывуць і сорак, і дваццаць, і сем гадоў — рознага стажу ў шлюбе. І маладыя на свае вочы бачаць, што калі развіваць адносіны са сваёй «палавінкай», то разам можна пераадолець любыя жыццёвыя цяжкасці.
—Хто звычайна наведвае «Вечары для закаханых»?
—Раней да нас прыходзілі маладыя вернікі, якія актыўна ўдзельнічалі ў жыцці Царквы. Сёння гэта часцей за ўсё студэнты, якія цікавяцца разнастайнымі рэчамі ў жыцці, адкрыты да новых ведаў, думак і поглядаў, якія працівяцца стэрэатыпам. Пра «Вечары» студэнты расказваюць адзін аднаму і самі нас рэкламуюць у студэнцкай браціі. Да таго ж нашы аб’явы можна знайсці на каталіцкіх сайтах.
—У якім фармаце праходзяць гэтыя сустрэчы?
—Адразу на першым занятку пасля знаёмства мы расказваем чым будзем займацца на працягу двух месяцаў. Мы распрацавалі каля дваццаці тэм для абмеркавання. Яны дапамагаюць перш за ўсё спазнаць сябе і партнёра. Тэмы таксама тычацца адносін мужчыны і жанчыны, адносін з блізкімі. Яны часта звязаны з будучым, напрыклад, з прыняццем дзяцей, прывычак, веры, асаблівасцяў. Мы, аніматары-вядучыя, толькі ілюструем, як прымалі тую ці іншую сітуацыю. Некаторыя з маладых, гледзячы на нас і на нашы гісторыі, вырашаюць, што яны так ніколі не будуць жыць, што ў іх будзе інакш, бліжэй да ідэалу. Іншыя лічаць, наадварот, што для іх наш прыклад занадта ідэальны і яны так ніколі не змогуць жыць. Мы ніколі не дэманструем ідэальную карцінку, а паказваем адносіны такімі, якія яны ёсць: цяжкасці, якія перажываем, і радасці, якія атрымліваем. Каб моладзь, размаўляючы на пэўныя тэмы, бачыла розныя шляхі вырашэння і вучылася сама знаходзіць іх.
Вечар доўжыцца дзве-тры гадзіны з кава-паўзамі, а потым закаханыя яшчэ атрымліваюць заданні. З падрыхтоўкай хатняга задання ў маладых праблем не існуе, бо на абмеркаванне тэм даецца тыдзень.
—Якая тэма больш выклікае цікавасць у закаханых?
—Тэма, якая выклікае і цікавасць, і спрэчкі — дзеці. Колькі і калі заводзіць, а потым пытанні прыняцця і выхавання дзяцей. Напрыклад, расказваем, як з падобных сітуацый знаходзілі выйсце мы з жонкай. Дарэчы, у нас шасцёра дзяцей. Хаця, калі б нам да шлюбу сказалі, што ў нас будзе іх столькі, то, скажу вам адкрыта, я пакруціў бы пальцам ля скроні. І праўда, ёсць такі стэрэатып, што шматдзетныя сем’і — гэта такія людзі рашучыя, якія з самага пачатку ведаюць, чаго хочуць. Магчыма, яны маюць яшчэ вобраз такіх вар’ятаў, якія яўна не былі прыкладам ні для мяне, ні для маёй жонкі. На «Вечарах» мы расказваем, як усё ж прынялі такую колькасць, аб страхах, якія перажылі ў гэтай сувязі, як бунтавалі, калі даведваліся аб кожнай наступнай цяжарнасці, аб думках пра аборт. Як баяліся, што мы не справімся, не асмельваліся сказаць пра новую цяжарнасць бацькам, пасавалі перад фінансавымі і бытавымі цяжкасцямі. Але з другога боку, паказваем радасць, якую адчуваем, калі ў доме з’яўляецца немаўля, ад свайго становішча, ад той падтрымкі і любові, якую адчуваем ад сваіх дзяцей. Мы не прапагандуем шматдзетнасць, проста расказваем, як спраўляемся з тым, што ў нас так атрымалася. Ведаю, што распадаюцца сем’і, дзе і чацвёра, і пяцёра дзяцей. Дзеці — не спосаб «склеіць» адносіны. Для гэтага ёсць зусім іншы шлях. Мы гаворым, што ў нашай сям’і шматдзетнасць — гэта адказ на наша каханне адно да аднаго.
—А як жа самы распаўсюджаны страх матэрыяльных праблем? Тое, што можна дазволіць сабе з двума дзецьмі, цяжка дазволіць з трыма і гэтак далей. Як вы прапануеце змагацца з гэтым?
—А мы нічога не прапануем. Мы расказваем, як з гэтым спраўляліся. Такі страх спадарожнічаў і спадарожнічае нам заўсёды. І з першым, і з другім і з трэцім…
Нам заўсёды здавалася, што з’яўленне кожнага наступнага дзіцяці адкіне нас за своеасаблівую мяжу. Але гэта аказалася праўдай не ў фінансавым сэнсе, а ў размеркаванні ўвагі дзецям. Мы заўсёды адчуваем жаль і віну перад сваімі дзецьмі за тое, што не ў стане надаць кожнаму ўвагі столькі, колькі было б увагі аднаму дзіцяці. Малыя так хутка растуць, што я не паспяваю заўважаць час іх сталення, спадарожнічаць з імі ў гэтым часе. Але я прымаю гэтую сітуацыю і раблю ўсё, што ў маіх сілах. Другая праблема, з якой мы сутыкнуліся, — асуджэнне шматдзетнасці асяроддзем і блізкімі. Калі ў нас было адно дзіця, мы нічога не разумелі. Калі два — нам падалося, што мы сапраўдная сям’я. Калі з’явілася трэцяе, то адчулі сябе свяцільняй, быццам бы мы — ідэальная сям’я. І, галоўнае, пра гэта нам гаварылі ўсе навокал: маўляў, малайцы, у такі час асмеліцца нарадзіць траіх. Аднак з нараджэннем чацвёртага ўсё змянілася: нам ужо ніхто не гаварыў, што мы малайцы, у лепшым выпадку маўчалі. У іншых — адкрыта казалі, што гэта безадказна і ненармальна… Для нас цяжка было прыняць рэакцыю бацькоў. І больш за ўсё дасталася маёй жонцы. Немагчыма захоўваць спакой, калі самыя блізкія людзі пыталіся, навошта нам яшчэ адно дзіця. Страх і няўпэўненасць і так жывуць у сэрцы жанчыны, а тут яшчэ асуджэнне асяроддзя і блізкіх людзей… Гэта перарастала ў праблему ўсёй сям’і. Але мы ўсё пераадолелі, таму што кахаем адно аднаго.
—Вы гаварылі, што на «Вечарах» можна даведацца аб сутнасці шлюбу. У чым жа яна?
—Для мяне асабіста — гэта відавочнае «перавязванне» людзей паміж сабой на ўсё жыццё. Сімвалічна гэта робіцца яшчэ на вянчанні, калі святар у праваслаўнай ці каталіцкай царкве падчас Таінства перавязвае рукі маладым і яны прамаўляюць абяцанні. Тут мне бачацца два бакі. Адзін — гэта немагчымасць развесціся (гэта спрошчанае разуменне шлюбу, якое мне вельмі не падабаецца). І іншы, больш дасканалы, — жаданне дваіх быць разам, жаданне асаблівай блізкасці, якая пачынаецца падчас Таінства і развіваецца ўсё жыццё. Аднак на «Сужэнскія сустрэчы» і на «Вечары для закаханых» часта прыходзяць людзі, якія далёкія ад Царквы і неадукаваныя ў гэтым сэнсе. Я бачу, як нашы словы і прыклады лёгка кладуцца на іх душы. Больш праблем бывае з людзьмі «вельмі рэлігійнымі», якія закасцянелі ў нейкіх сваіх перакананнях і лічаць, што ўсё павінна праходзіць у нейкіх рамках і межах. Некаторым з іх здаецца, што ўсё, аб чым мы гаворым на сустрэчах, — гэта занадта свабодна. Але патрэбна разумець, што нашы сустрэчы і вечары не маюць адкрытай багаслоўскай рыторыкі. Хоць многія людзі дзякуючы ім наноў адкрываюць для сябе царкву, бо бачаць, што і там людзі з пачуццямі, праблемамі, сваімі радасцямі і болем. У нас усіх, веруючых і не веруючых, ёсць адно жаданне: мы хочам любові, кахання і разумення.
—Ёсць меркаванне, што ў Царкве ўсё занадта патрыярхальна, што жонка не мае права пярэчыць мужу…
—У пытанні размяркоўвання функцый у сям’і мы не ўплываем на людзей. Кожная пара робіць свой выбар, як ім будаваць адносіны. Галоўнае, каб жаданне патрыярхату, матрыярхату ці раўнапраўя не зыходзіла толькі ад мужа ці толькі ад жонкі. Мы накіроўваем пару на дыялог, каб яна гаварыла паміж сабой, каб кожнаму ў створанай ці будучай сям’і было камфортна, каб рашэнне прымаць на сябе адказнасць аднаго з сужэнцаў не зневажала і не знішчала годнасці другога. «Вечары для закаханых» — гэта падрыхтоўка да шлюбу. І калі адзін з пары разумее, што ён не згодны і не гатоў пражыць жыццё з чалавекам, з якім яму цяжка дамовіцца ў чымсьці, то лепш адмяніць вяселле, адмовіцца жыць побач з гэтым чалавекам.
Больш за тое, мы нават лічым поспехам, калі ўдзельнікі «Вечароў для закаханых» расстаюцца ці адкладваюць вяселле і бяруць час на роздум. Гэта значыць, што мы добра папрацавалі, што пары прымаюць рашэнне ажаніцца ці разысціся не на падставе эмоцый, а на падставе розуму і распазнаных пачуццяў. Бывае і наадварот, прыходзяць маладыя ў самым пачатку сваіх адносін і падчас вечароў разумеюць, што іх пачуцці развіваюцца ў добрым кірунку, што ім разам хораша, у іх атрымліваецца дамаўляцца па самых неверагодных пытаннях, і яны прымаюць рашэнне ажаніцца. Спадзяёмся толькі, што сем’і, якія ствараюцца пасля наведвання вечароў, будуць такімі, дзе пануюць любоў і згода, дзе сужэнцы слухаюць адно аднаго, разумеюць сваю «палавінку» і заўсёды гатовы прабачаць.
Наталля ТАЛІВІНСКАЯ.
Для таго каб пакінуць каментар неабходна
Аўтарызацыя або
Рэгістрацыя