18 снежня 2022 года ў Доме Святой Тройцы ў г. Баранавічы адбылася сустрэча малой групы, якая распачалася з праслаўлення Пана на святой Імшы. Тэму "Нашы Каляды" падрыхтавалі і правялі Крысціна і Юрый Петран разам з айцом Сцяпанам Цэргелем SVD. У сустрэчы ўдзельнічала 7 сужэнстваў і сястра Паўла Бабёр MSF.

Звычайна мы з нецярпеннем чакаем Калядаў, Новага года. Мы ўжо стаміліся ад будзённай працы, ад штодзённасці. Нам патрэбная нейкая перамена, разнастайнасць. Успаміны свята з дзяцінства вельмі яркія: мы чакаем ёлку, падарункаў, сустрэчы з сям'ёй. Магчымасць сустрэцца з блізкімі, сябрамі выклікае радасць.

Але разам з тым вядучыя ў сваіх уводзінах зрабілі акцэнт на тое, што варта ўсвядоміць, ці памятаем мы, што гэта за свята? Можа, Каляды ў нашай сям'і гэта толькі куцця, святая Імша апоўначы і сямейная сустрэча? Наколькі існуе ў нас дасведчанасць, што гэта свята любові Бога да чалавека, любові Бога да нас як мужа і жонкі? Удзельнікі сустрэчы шчыра дзяліліся сваімі пачуццямі з нагоды надыходзячых Калядаў і чаканнямі таго, што прынясе свята ў духоўным сэнсе. Аб якім свяце мы марым? Бо пакуль ідзе Адвэнт, час чакання. Адвэнт можна разумець таксама шырэй, у кантэксце ўсяго нашага жыцця, якое здаецца няспынным чаканнем. Чаго ж мы па-сапраўднаму чакаем у жыцці?..

Сустрэча скончылася цудоўнай, па-сапраўднаму сямейнай трапезай кахання.

Для таго каб пакінуць каментар неабходна Аўтарызацыя або Рэгістрацыя