Жадаем падзяліцца радасцю пра тое, што пасля летняга перапынку і адпачынку мінскі цэнтр "Сужэнскіх Сустрэч" прыступіў да працы - з 23 па 25 кастрычніка 2015 г.  прайшлі асноўныя рэкалекцыі ў Ляскоўцы.  Сярод удзельнікаў - 2 святара(капуцын і кармеліт з Мінска) і 7 сужэнскіх пар з Маладзечна, Смалявіч і  Мінску з сямейным стажам ад 1  да 25 гадоў. Ва ўікэндзе бралі ўдзел змяшаныя сем'і: дзе адзін з сужонкаў  каталік, іншы - праваслаўны. Гэта яшчэ раз дало нам магчымасць адчуць  адзінства веры ў Ісуса Хрыста!

Праводзілі ўікэнд: брат Андрэй Жылевіч, Аляксандр і Вольга Панамаровы, Сяргей Кутынка і Алена Бражнікова, Анатоль і Людміла Завадскія.

Усе пары, якія запісаліся на гэты ўікэнд, змаглі прыехаць і  прыняць удзел у клопаце пра шлюбнае каханне. Вядучыя пары ад шчырае душы дзякуюць за выдатную дружалюбную атмасферу, якая панавала на працягу гэтых дзён. Дамоў мы ўсё з'яжджалі з радасцю ў сэрцах і надзеяй, што дыялог можа дапамагчы не толькі нашым сем'ям, але і сужэнствам, якія знаходзяцца побач з намі. Вельмі важна атрымаць гэты першы імпульс, першую прыладу, першыя веды і загарэцца жаданнем практыкаваць Дыялог у сваім паўсядзённым жыцці. І тады будзьце ўпэўнены, ваш шлюб зайграе яркімі фарбамі: хтосьці зможа з Божай дапамогай выйсці з крызісу, хтосьці навучыцца слухаць і чуць адзін аднаго, хтосьці зможа правільна выяўляць свае пачуцці, а хтосьці ўзброіцца ведамі для будучай гісторыі свайго шлюбу. Галоўнае, што ніхто не застанецца абыякавым.

Хацелася б асобна падзякаваць брата Андрэя Жылевіча за духоўную падтрымку на працягу трохдзённых рэкалекцый, за важныя словы падчас пропаведзяў на Святых Імшах, а таксама за гасціннасць, аказанае нам "Карытасам" у гэтыя важныя дні. Асобнае дзякуй кухарам за смачныя стравы, прыгатаваныя адмыслова для нас (з каханнем!).

Вельмі цешыць нас таксама і тое, што ўдзельнікамі ўікэндаў "Сужэнскіх Сустрэч" становяцца таксама святары, якія на працягу гэтых дзён перажываюць свой індывідуальны дыялог з Богам і дапамагаюць духоўнымі навучаннямі падчас Святых Імш. Гэта дае нам вялікую надзею на далейшае развіццё руху ў Беларусі.Мы вельмі ўдзячныя ўсім за ўдзел і за кожнае слова! Хай Бог благаслаўляе вашы сем'і, вашых дзетак і вашых родных і блізкіх людзей!

Выказванні ўдзельнікаў:

"Хачу падзякаваць за ўсе вашыя сведчанні, а таксама ўсім тым, хто меў адвагу прыехаць на гэтыя рэкалекцыі. Як святару мне вельмі важная бычыць тых, хто хоча нешта змяніць у сваім жыцці. Важная бачыць, каб не падаць духам. У Сужэнскіх Сустрэчах для мяне самае галоўнае - гэта сустрэча з вамі, як з асобамі, важная спадарожнічаць вам. Я бачыў, што і вам гэта патрэбна. Дзякую."

" Вельмі спадабалася. З'яжджаю з пачуццём спакою. Пазнала мужа трохі глыбей. Не думала, што ён пра гэта разважае. Мы ідзём да адной мэты".

"З'явілася пачуццё ўпэўненасці. Сям'ю заўсёды можна захаваць. Пры добрых адносінах лягчэй будзе прайсці гэты шлях. З'яжджаю з пачуццём падзякі".

"Мы ў сям'і так шмат размаўляем, што я думала, што ўсё ўжо ведаю. Але за сталом ці ў халадзільніка шматлікія рэчы па-іншаму ўспрымаюцца. Я добра ведаю свайго мужа, але калі я пачула, што ў яго дрыжыць голас, зразумела, што ён вельмі моцна перажыў рэкалекцыі. Крануў дрыготкі голас мужа. Упэўнена, што будзе яшчэ лепш, будуць змены. Патрэбныя такія сустрэчы".

"Ніколі не думаў, што куды-небудзь паеду. У выніку я зразумеў, што мая жонка ідэальная.  Я зразумеў, што чую толькі сябе. Тут я атрымаў першую "таблетку" …гэты пачатак курсу тэрапіі".

"Калі ехалі, не ведалі - трэба нам гэта ці не, скептычна да гэтага ставіліся. Сустрэчы далі ўпэўненасць у тым, што людзі не самотныя, да іх хтосьці прыйдзе на дапамогу, дасць параду. Усё дапамагае развіццю сям'і".

"Заўсёды думала, што жыву з Богам.  За паўгода загналі сям'ю ў такую яму, што не маглі глядзець у вочы адзін аднаму, мелі пачуццё нянавісці. У сям'і быў толькі маналог з майго боку. А сёння мы здольныя трымацца нават за рукі".

"Вельмі шмат эмоцый.  За 2 дні вельмі шмат перажылі. Атмасфера вельмі збліжае. Дзякую Богу за тое, што нас усіх тут сабраў".

"Я не чакаў, што так будзе.  Было вельмі цікава, спадабалася. Адкрыўся тут (я наогул у жыцці негаманлівы). Удзячны за тое, чаму тут навучыўся".

"Пазнаў шмат новага. Зразумеў, што падобныя праблемы ва ўсіх. Будзем практыкавацца. З'яжджаю з пачуццём радасці і супакою".

Вольга Панамарова

Для таго каб пакінуць каментар неабходна Аўтарызацыя або Рэгістрацыя